Le Rétroviseur qui fait revivre !

Julot (qui fredonne l'air des Mountches) : Donne mi incor un verre, va, Patronne... avant qu' cha r'comminche !

Patronne : Tin, Julot... Cha fait déjà l'quatrième ! Te pinss' pas qu'te comminches à n'avôr assez ! (Elle donne, il boit)

Julot : Eh, Patronne, incor un... avant qu' ça r'comminche ! (Il boit d'un trait) Incor un... avant qu'ça r'comminche !

Baptiste : Bin, dis, Julot, Te dis toudis "Avant qu'ça r'comminche, avant qu'ça r'comminche "... mais quo qu'ch'est qui va bintôt r'comminchi ?

Au même moment, la porte d'entrée s'ouvre brutalement, apparaît Simone, l'épouse de Julot

Simone : Julot !....

Julot : (gémissant) Ca y est... Cha r'comminche !

Simone : Ar'tourne à l'majon ! (Titubant, Julot quitte avec sa femme, furieuse)

Baptiste : Bin, mi j'voudro pas êtr' à s'plache ! Ein femm' parell" I dô suremint rin avôr à dire à s'majon.

Louis : Te sais, Baptiste, ch'est tout partout pare'll. Ti non pu, t'as rin à dire à t'majon. Te viens faire l'malonj, ichi, mais mi, j'connos assez t'feimme et s'n air de commandante pour savôr que, ti, aussi grand qu' t'es, ah bin, te cours comme un p'tit mouton... Juste pare'll 'l même que Julot !

Patronne : A ce qui parait, quand qu'y a des noces d'or dins l'commune, l'Bourguemait i deminde toudi : "Qui qu'ch'est qui "porte l' maronne" din l'ménache ?", pour savôr à qui qui dôt donner l'enveloppe de l'commune ! Et ch'est toudi l'feimme !

Baptiste : Peuh... pour chin qui donn'nt, à l'commune ! Quand qu' t'as payé l'Patronne pour l'verre de vin d'honneur que te veux offert à tes invités après l'réception, i n'in reste pu ! Ch'est pô vrai ? Patronne ??

Patronne : Cha va aller, ouais Baptiste, dis incore que ch'est mi qui m'inrichis su' l' dos de l'commune !

Louis : Dis, en parlant de l'commune ! Mi, j' m'deminde bin commint cha va aller avec les fusions. Inn in parl'nt tellemin à l' télévision !

Patronne : Mais, Louis, avec quo qu'te t'imbêtes ? Nous, in fait pas d'politique ichi ! Ichi, ch'est l' bistro du Mitan, et i dô rester au mitan du canton !

Louis : Ecoute Patronne, n'oublie jomais cha : si te t'intéresses pas à l'politique,... l'politique, elle, elle va s'intéresser à ti !
"Avec quô que j'm'imbêtes ?... Avec quô que j'm'imbêtes ?" T' es pire que s'feimme à Julot ! In tous les cas, in peut pas dire qui s'embête'nt gramint, les ministres ! Sauf chti là de l' Intérieur, Michel qui s'appelle, qui veut ramener les 2739 communes de Belgique à 589 grandes communes fuxionnées, exactemint !

Patronne : Et tout cha, cha va servir à quô ??? A payer incor' puqu' d'impôts ?