le "RÉTRO-VISEUR"

Louis : Au fait, Et quô qu'ch'est qu'Warneton, i veut faire, li ?

Baptiste : Bin, t'l'aurôs d'mindé à Julot... I vient de partir ! Y est d'Warneton, li ! T'li aurô payé un verre à s'feimme quand qu'elle intrô, cha n'aurô p't-êt' pas r'comminchi. Et y s'rôt'nt incor ichi !

Louis : Et ti, Patronne, t'as jamais rin intindu d'ène séquô ?

Patronne : Mi, j'ai pu rin à dire,... Et puis, j'dôs m' taire....Même que j'devros êtr' tenue par l' secret professionnel, mais, j'ai entendu (elle s'approche confidentiellement) l'aut' fô, ch'étot après un Consell' Communal, i sont tertouss venus ichi pour faire ène deuxième réunion... intr'eusse... " à huis clos", comme y dist'nt.

Louis : Ah ouais ? Et quo qui z'ont dit ?

Patronne : Ah, mi, j'sais pas... Mi j'écoute pas. Et puis, pour ène bonne cabarétire, cha s'fait pas. J'ai servi les tournées, les unes après les autes. I z'étot'nt tous à babili l'un pu fort que l'aut', mais p'incor "brin de zing". (Elle s'approche et dit confidentiellement) J'ai entendu, comme cha, quand j'servô entre les taf', que l'Bourguemait d'Warneton y a peur...

Baptiste : Y a peur ? Peur de quô ?

Patronne : I dijot, comme cha, qu'in d'vrô pas ar'venir au timps passé. Si en 1850, après bin des disputes et des querelles d' clotchi, si l' petit village d'cinsis d'Ploustère y a voulu s' séparer d'Warneton... et avôr s'n indépendance... I peut pu r'venir avec les Mountches !  "Qu'y s'démerd'nt" qu'y z'ont dit !

Baptiste : Pourtant, mi j'pinse, comme je l'dijot t'alleur, cha s'rô bin ! A Warneton, y aurô les gins "de la ville" et ceusse de l'Jatte.. et à Ploustère y aurô les cinsis et ceusse de l'briqu'trie !

Louis : A Warneton aussi y a des briqu'teries... et ène tannerie !

Baptiste : Ch'est qu'eine manière de parler ! Continue, Patronne. Quo qu'i z'ont incore dit ?

Patronne : J'sais pas mi ! J'ai pas l'drôt d'écouter chin qu'les clients y racon'tent et j'ai incore moinsse l'drôt de l'raconter !

Louis : Ecoute, Patronne, si qu'te l' dis à nous-aut', tu peux n' êt' sûur, cha va rester entre nous ! Y a pas ène parole qui va sortir d'ichi !

Baptiste : Alleei, Patronne, Quo qu'i z'ont incore berlaffé ? Fais pas l'innochin !

Patronne : (elle revient confidentiellement) Bref, Warneton, ch'est pas avec Plostère qui veut fusionner, mais avec...Vous n'allez pas m' crôr ! Mais avec... Bas-Warneton !

Louis et Baptiste : Hein ?

Ernest : Quô "Hein" ? Y a eine séquo qui va pas ?

Louis : Bin, Ernest ! T'est dur de comprenure... Mais te vas comprind tout-d'sute !
L'patronne, elle vint d'explitchi qu' Warneton y veut pô fusionner avec Ploustère malgré qu' li, y voudrô bin ! Non, i veut fusionner avec Bas-Warneton qu'li, y n'veut pon !

Ernest : J'comprind pô !

Baptiste : Ch'est comme si qu'tin garchon y voudrot s'marier avec ène fill' qui a connu quand qui s'étot'nt petits et qu'mai'tnint, l'fill', elle est amoureusse d'un aut' qui est sur l'point de s'marier avec eine aut' femme.... qui va bintôt accoucher, vla ! T'as compris ?

Ernest : Ah ouais, là, j'ai compris ! Ouais, ouais... j'ai bin compris. J'sus pas un Béor, mi, sais-t'  !!

Louis : Ah bin, si l'situation des fusions elle est comme cha ! In est bin parti ! Cha, ch'est comme in dit : "La quadrature du cercle".

Patronne : "Le Cercle !" Cha m'revient, mait'nint... Même qui z'ont dit : "Avec les Comino, tout y va s'faire au Cercle catholique. Avec les Plousterto, tout y va s'faire à Maison du Peup' ! Tandis qu'avec Bas-Warneton... in pourrot toudis aller faire les fêtes au Poulali ! I n'y verront que du Bleu... et i s'appell'nt déjà des Bas-Mountches !" (en imitant leur geste dédaigneux)

Louis : Ah, ch'est comme cha.! Bin mi, j'sais chin qui me reste à faire. Patronne, est-ce que j'peux téléphoner ?