Le Rétroviseur qui fait revivre !

Louis : Ouais... Principauté.... Comme à Monaco !

Baptiste : comme à Lichtervelde, aussi

Julot : Mais non,..."Lichter-stène"

Louis : Alors... Comme in s'rô ènePrincipauté.... In auro pu èneribambelle d' ministres à payî, in auro pu d'Rô, ni d'Reine, ni d'Princesses qu'on sort toudi avec tout leu garde-robes....In pairô pu d'impôt....In s'rô indépendant sur nous-autes mêmes, Même que les Flaminds et les Wallons, y s'arrot'nt pu rin à dire ichi ! Incor qu'in parlerô Chinô dans nos écoles !

Patronne : Chino ? Qu'i continu'nt seulemint à nous laichi parler Chtimi !

Julot : Cha, ch'est ène bonne idée, cha....Quo qu't 'in pinse, vous-autes ?

Patronne : Tout cha ch'est bin,... mais qui est-ce qui va comminder ! Et te pinses que tous les autes bourguemait' y vont êtr' d'accord !

Julot : I s'ront obligi ! Ch'est cha l'démocratie, !

Simone : Ouais, bin... te peux compter là-d'ssus et bôor d' l'éauw ! Julot ! J'ai bin dit d' l'eauw !

Julot : (agacé) Ca y est, cha r'comminche ! Ecoute, Simone, tu vas pas m'faire endeuver à c'tt heure ! Et puis, r'tourne à l'majon... ch'est pas ène affaire pour ti, va vite à t'machine à coud', t'as assez d'boulot à r'coud' des pièces à min pantalon de l'Jatte ! Allez va ! Autremin, in va avinchi à rin !

Simone: Après tout, t'as raison ! Cha va quand même jamais aller, tout ce que te radotes ! ... Mais, ti Julot, rentr'pas avec une tchu'te... pache que te vas aller dormir din l'cabanon, cha ch'est mi qui l' dit ! (Simone s'en va) 

Baptiste (qui rit) : I va aller dormir avec ses laponj !

Ernest : Y a pas d'laponj... ch'est des coulons !

Louis : Silence ! D'quô qu'in parlôt incor ? Ah ouais,... Qui ch'est qui va commander !
J'proposs' pour cha, des élections démocratiques, pour élire un PRINCE, chti qui va régner... comme l'prince Raigner, à Monaco. I règne, et y a rin à faire. Tout c' qui dô faire, ch'est d'la délégation...dans les cirques... avec les acrobates.... les touristes....les interremints des places royales.... les acteurs

Ernest : Nous-aut', alors ? In n'est pas des Béor !

Baptiste : Mais non, des acteurs de cinéma. Te t' prinds pour qui, ti ?

Louis : Silence. Ch'prince....i s'ra nommé pour chinqu' ans. In peut quand même pas l'mettre à vie....Te vô pas d'ichi, qu'après deux-tros ans... I mène la vie comme un grand béor, avec des bagnoles, des maitresses, des g'va ? Dans not' nouvell' constitutionj , in dôt pouvôr n'in mett' un aut' si qu'i est pas capab' ou si qu'i brûle l'kandelle par les deux bouts !

Julot : Cha, ch'est ène bonne idée, cha....Quo qu't' in pinse, tis-otes ?

Baptiste : Mi, j'laisse dire ! J'sus toudi d'accord sauf quand qu' j' sais pas êtr' d'accord !

Louis : Bon, cha ch'est ène première chosse ! Deuxième chosse à régler : L'économie. Ichi, in dô pô s'montrer difficile parche que notre vrai canton, not' future principauté...(applaudissements) n'est naturellement pas riche et ses habitants sont tertous des braves gins, issus pour la majorité d'un milieu ouvrii, mais, i faut tout de même trouver l'occasion...d' pu payer d'impôts !

Baptiste : Comme à Monaco !

Louis : Pour cha, i faut qu' tout le monde y peut ouvrer ichi et, comme cha, y aura pu d'chomeurs. Tout le monde y pourra profiter des sous qui a gagni et accater à mingi pour tout s'famill' !

Julot : Ouais, mais quô faire pour donner du boulot à tout le monde ?

Louis : J'y ai pinsé, figure-te : In va c'mminchi par créer un zoning avec deux - trois industries, pas pucque, qui vont donner gramin d'ouvrache pour les gins de l'principauté ! J'ai bin dit : "de l'principauté" !

Julot : Cha, ch'est ein bonne idée, cha....Mais, i faudra bin réfléchir sur chin que les investicheux y vont v'nir fabriquer, ichi !
Cha peut pas faire de brû...
Cha peut pas faire de l'fumée norte ni de l' poussire...

Baptiste : Cha peut pas sentir la peste ! Pach' qu'à Plostère, nous-autes, in est servi ! Cha, ch'est mi qui l' dit !

Louis : Tin à propos d' cha ! In d'vra aussi prévoir ein séquo à propos des nitrates ! Not' eau d'pû', elle est pas potab'. Et cha, cha dô cangi !

Baptiste : Commint qu' te vas faire pour cangi tout cha ! Y a gramin trop d' pourchéauw, qui picht'ent et qui tchit'nt din des citernes qu'in dô aller vidi sur les ckamps avec des béneaux qui s'arros'tent, comme cha, tout in évintall"... Te peux pas impéchi l'brin d' sintir l' brin !

Louis : Justement, c't odeur;... ch'est pas bon pou' l' tourisme ! Alors, in va recycler l' lisier

Fifille : L' lisier... C'est quô cha ?

Julot : Mais Gina, ch'est l' purin des cochons !

Louis : In va recycler c' puroinj en engrais – granulé ! Comme d' l' engrais ross' Mais y s'ra suremint brun clair...

Baptiste : Comme des cacahuettes, alors ! Mi, j'en minge beaucoup quand j'bô ène pinte !

Louis : Bin, t'auras intérêt à pas t' tromper !
J' dijô donc... qu'en transformant l'lisier en engrais-cacawète...  i va pu poluer l' nappe "aphréatique"

Fifille : Nappe phréatique ! Pas "aphréatique"... Je l'sais bin, in étudie tout cha au cours de physique !

Simone : JULOT ! ! ! Oh pardon....J'pinso qu'ch' étpot pô incor comminchi !

Julot : Simone, tu vô bin qu'in est en réunion. Si qu'te veux assister, te dô t'assor et laichi les hommes parler !
Donc, j'dijo... Qu'in est bin din l'brin et qu'in dô pô s'laichi faire ! Mais quô faire ?
En examinant l'situation à tête reposée, c' que j'ai fait, hein Simone, i faut l'arconnotte, que pou' l'Gouvernemint, ch'étot po possible de trouver ène solution qui aurô été bin pour tout le monde.
Ch'étô donc comme la "Conjoncture du Cercle" !

Louis : la "Quadrature"...

Julot : Ch'est cha... comme te l'dis, Louis. La quadrature du cercle !
J'explique : Tout l'brin, y vint à cause d'Warneton qui a pas voulu alléi avec Plostère ! Comme cha tout y a auro été gramin pu facile que l'Gouvernemint y auro été obligi d' sûiv' l' souhait démocratiquemint décidé par les concitoyens.
Mais vlà, les Minist' y s'sont pas fait d'bille : i z'ont suremint dit comme cha : "Dins c'p'tit tchun d' Belgique, qu'in n'sait même pas si ch'est incor la Flandre wallonne ou déjà la Wallonie Picarde, si i sav'nt pas s'mette d'accord, alors in va tertouss les mett' dans l'même sac, et i n'ont qu'à s'débrouli, avec leu' dettes, leu' pompi, leu' bourguemait' et tout leur bataclan !

Ernest : Ouais, tout cha, ch'est un biau discours, Julot, mais quô qu'te proposs'

Baptiste : Pour mi, si Julot i proposs' de mett' ein tournée pour s'fèmm'qui est arrivée l'derni're, ce s'rot bin pour comminchi !

Julot : Ch'est pô l'momint d'dire des carabistoulles, hein Baptiste. L'affaire, elle est sérieusse, plus que sérieusse !

Ernest : Bin ouais, Baptiste, ch'est comme à tin foot-ball à Plostère, te discutes et te fais... et te gagn' jamais rin ! Au fait... y est toudis, là, l'grand....commint i s'appelle incor ?.. c'grand gueulard ?.

Louis : Oh, stop, l'réunion, ch'est pas pô pou parler foot-ball !... Continue, Julot !

Julot : Ah.. bin... Ch'est tout ! Mi, j'ai dit c'que j'avos à dire... mais j'vô pô c'qu'in pourrô bin faire !
T'as ène idée, ti, Louis ?

Louis : Bon... (il va à la tribune)
Mi, j'sus d'Bas-Warneton. Ti, Baptiste, t'es d'Plostère. Ti, Ernest... t'habites à Houthem, et ti, Julot....Tout le monde y sait qu't'es un vrai Mountche... et qu' t'habites au d'Geer !

Julot : I manque quéqu'un d'Comines !

Louis : Bin, tant pire ! Les absents ont tort ! Y en a p't-êtr' qui vont arriver ! In n'sais jamais !
Mais, dans tous les cas, chti-là d'Comines, euh... i d'vra êtr' d'accord avec c'qu'in aura décidé !

Julot : Ah, te crô cha, ti !

Louis : Bin, avant qu'i arriv', mi, j'proposs qu'on décide d'une... d'une.... Commint i dijo cha...?

Julot : Qui cha ?

Louis : L'général De Gaulle ....I dijot toudi dins ses discours : "L'autodétermination"... Ch'est cha.... Donc, in d'vrô décider nous-otes-mêmes d'une autodétermination qui dirôt que nous-otes, in a l' drô à un statut spécial européen. J'dis bin : Européen dans le Marché Commun.
Pour cha, la seule ville historique du Vrai Canton, Warneton, avec les quatre petites communes et les deux hameaux qui sont tout autour, in dôt s' déclarer : PRINCIPAUTE.

Ensemble : Principauté ???

(Julot entre)

Julot : Salut ! Bin, y a incor personne ?

Patronne et Fifille : Si, nous-autes

Julot : Non, non, Ti z'autes, te comptes pas ! Mais quô qu'a foutu, ti z'autes, ch'est pô comme cha qui fallot les mettr' ché kayelles. In n'in attind tros chint. In d'a déjà 290 là (en indiquant le public)

(Et Julot replace une rangée de chaise, face au public, et déplace la table de l'orateur sur l'avant-scène. Entrent successivement...)

Louis : Salut ! Bin, j'vos que j'sus pas l'premi ! In n'est qu'à deux ?

Julot : Non eh, in va être à 300 ! Même peut-êtr' puque !

Louis : Trô chint ???

Patronne : Trô chint ! Y est tcheu su' s' tête, li ?

Julot : In n' s'ra pas lonj !

Louis : Et y aura des grosses légumes de la politique à t'réunion ?

Julot : Ah, non, i faut les t'nir in déhiors de tout cha ! Autremint, I vont voulôr tertouss t'nir l' crachôor et i vont s'battili et in va pu rin comprind ' D'ailleurs, j'ai promis au journalisse d'li donner un rapport de l'réunion. Comme cha, i d'vra pas dérangi. Et cha va êtr' not' son d'cloche à nouz-aute qui va êtr' écrit dins l'journal !

Louis : Ouais, ch'est une bonne idée... parce que, si y a pas d'photographe, les politiques y venn'nt pas ! Y a qu'une chosse qui les intéresse : vir leur binette dins l'gazette !

(Baptiste entre)

Baptiste : Salut tout le monde ! Ch'est d'jà c'mminchi ?

Julot : Ba bin non, on attind les aut's !

Baptiste : Ch'est qui les aut's ?

Julot : Les aut's !!! Assi'te... Là, in attindint !

Baptiste : In attindint l'première tournée ?... Tout à fait d'accord !

Ernest (essouflé) : Salut ! J'sus pô l'derni ?... Non ? J'ai dû courir comme un béor que j'étos un r'tard ! Mi et m'fèmme, in a dû r'tourner tout l'maijon pour ar'trouver sin sac à min garchon ! I dvô aller juer à Kemmel, i l'avot oublii ichi ! Alors, l'timps qui s'est rappelé, qui est v'nu l'chercher, et que j'ai dû l'condur au local... J'sus au bout de m' madeleine... avec c' béôôr !

Baptiste (rire): Béor, Béor... I dit cha à tout l' monde... même pour li et sin garchon !....

Julot : Allez, Allez, in va pô perdr' d' timps, Assoyez-vous, tertouss. In va c'mminchi. Chti qu'i est à r'tard, i paiera ein tournée générale !

Baptiste : J'sus contint qu'ch'est toudi pas mi... et chti-là qui va arriver à r'tard... qui s'dépèche, pache qui mi, j'ai sô !

Julot (à la table de l'orateur) : Mesdames, Messieurs.... L'situation des fusions, elle est catastrophique !
J'ai lu din l'journal que... attendez... j'va vous le lire :
"Le projet de loi du Ministre Michel est déposé au Parlement pour le vote à propos des fusions de communes dont voici la nouvelle répartition qui entrera en vigueur à partir du 1er janvier 1977... – y a incor plein d'bazar d'écrit qu'on comprind rin, afin, bref, plus loin, y est écrit : ... la nouvelle entité de Comines-Warneton : comprendra les anciennes communes de Bas-Warneton, Comines, Houthem, Ploegsteert et Warneton... "

Louis : Cha, in l'savot. In sait accater l'journal aussi, sais-t'

Julot : Donc...En deux mots : In est bin din l' brin jusque lào ! Et in dô pas s'laichi faire !

(Simone entre précipitamment)

(Patronne revient avec des caisses de bières)

Fifille : Ah patronne, y a quelqu'un qui est v'nu et y est déjà r'parti !

Patronne : Ch'étot qui ?

Fifille : Connôs pô !
J'ai même pas d'mindé sin nom ! Y étôt juste venu pour querre un sac rouche et gaune. Il l'avot oublii !

Patronne : Au Ouais... L' Fissanénes,!

Fifille : Fils quoi ?

Patronne : Fissanéness... sin garçhon à Ernest Tout le monde y l'appelle comme cha ! Ch'est sin garchon à Ernest...Ernest Ducornez. Chti là du Mai-Cornet ! J'pourrô bin pas dire sin p'tit nom ! A m'motte que cha dô êt' Francis !

Fifille : Tout cas, ch'est un drôle de zozo. J'pinse qu'i voudrôt bin...

Patronne : Qui voudrô bin quô ?

Fifille : "Aller avec mi !"

Patronne : Et d'ù ?

Fifille : Nule part, mais qu'in va insonne !

Patronne : Déjà ? Bin, les jeunes d'aujourd'hu', cha va vite ! I suffit qui s' vot'nt chinq minutes, qui veul'nt déjà dormir insonne !

Fifille : Là, Patronne, t'exagères !

Patronne : Et ch'ti là d'Ploustère ! C'fout-balleux que t'as même pas voulu dire sin nom,... te vas déjà l'fout' à l'cour ?

Fifille (qui souffle)... : Ouais... J' l'aime bin, ch'est vrai... mais, i' le sait pon ! Ch'est comme si y a rin d'fait ! Et puis, j'suis libre ! J'suis bintôt majeure ! Et... j'vais même dire... que j'prends mes précautions ! Cha, ch'est m'mère qui m'oblige ! Parc'quelle voudro pô que ça r'comminche !

Patronne : Quô qui r'comminche !

Fifille : Bin, que m'mère elle étôt enceinte quand qu'i z'ont dû s'marier !

Patronne : Ah c'est cha qu'tin père quand qu'i parle d' ti, i dit : "M'fille Ogino". Ch'est cha qu'tin prénom ch'est "Gina"

Fiston (surpris) : 'Jour !... euh... Mam'zelle... euh... L'patronne, elle est pas là ?

Fifille (intimidée) : Si, si... elle est partie à l' cav'. Ch'est pourquô ?

Fiston : Bin, j'va rev'nir...

Fifille : Non, non, reste.... attind ène minute !

Fiston : Et puis t'as raison,... j'vais l'attind'

Fifille : Ch'est comme te veux... mais elle va pas êt' longtimps partie !

Fiston : Vous travaillez toujours, ichi, Mam'zelle ?

Fifille : Non, y a qu'aujourd'hu' !

Fiston : Ah ? Et quo qu'vous faites, autremint, les aut' jours ?

Fifille : J'va incor au collèche ?

Fiston : Ah ouai ? Mi, j'vais à l'athénée ! Ch'est cha qu'in s'est jamais renscontré ! J'y va à vélo quand qu'il pleut pas !

Fifille : Mi j'prind l'bus !

Fiston : T'aimes bien l'foot-ball ?

Fifille : Ouais et non ? Des fois !

Fiston : Cha veut dire quô : des fois ?

Fifille : Cha dépind pour qui ?

Fiston : Bin écoute, j'sus v'nu pour r'prind min sac de foot-ball que j'ai oublié tt'à-l'heur, parce que j'dos vite y aller, On a un match d'Coupe pour l'Westhoek. Chez les Flaminds. In part dins ène demi-heure ! Mais l'prochaine fô qu'in joue à la maison, j'va t'avertir, t'as qu'à v'nir vir' !

Fifille : Te joues où ?

Fiston : Avec Houthem ! Aujourd'hu, in va à Kemmel et In va ga'ni... si y z'ont pas accaté les arbit !

Fifille : T'as qu'à n'accater aussi... des arbit !

Fiston : Ti, t'as pas l'air de connot' gramin l' foot-ball ! Mais, te m'plais bin quand même !
Alléi, j'm'in va ! Je peux t'faire ein baisse ?
(A la porte de sortie ) Ch'est comment tin p'tit nom et t'n adresse ?

Fifille : Pourquô te dô savôr cha ?

Fiston : Bon... si qu' te veux pas l'dire.... Te restes là ! (Il sort en chantant une ritournelle de foot et en emportant son sac)

Fifille (fâchée) : Quelle conne que j'sus ! J'ai même pô dit qui j'étô et pô d'mindé sin nom !

Fifille : Quô te d'minde là ! Je n'd 'ai pluss' qu'un ! Mais i n'd a un que préfère et, li-même, y l'sait pô !

Patronne : Ah ouais ? Et in peut savôr qui ch'est ?

Fifille : Cha, ch'est min secret à mi ! A mi tout seu'l ! Min père et m'mère, i le savt'nt pas non pu ! D'ailleurs, qu'est-ce que je m'f'rô engueuler s'ils le saurot'nt !

Patronne : T'as quelle âche ?

Fifille : J'va sur mes 18 ans ! Te sais, min père et m'mère, quand qu'y s'étot'nt jeunes, i z'ont vécu dins les jupes des tchurés ! Mes deux pépés et mes deux mémés, ch'étot'nt tous des guernoulles de béniti !

Patronne : Bin quô, Dins l'temps passéi, Fifille, ch'étot presque toudi comme cha et... ch'étôt de l'bonne éducation,... ^Pétête mi qu'à c't heure !

Fifille : J'dis pas l'contraire, Patronne, mais... Horeusemint, qu'au jour d'aujourd'hu, tout cha, cha a bin cangi ! Horeusemint qu'y a eu Mai 1968 pour un p'tit peu faire réfléchir les jeunes... et même les vi'. Les jeunes, i z'ont dit alors : "Il est interdit d'interdire !"

Patronne : Et les vi', i z'ont répondu : "Faites l'amour, pas la guerre !" Ch'est à c' momint-là, que l'capotte anglaisse, elle est rev'nu au gout du jour, sans tabous. Pach'qu'avant, ch'étôt un péché d'in parler !

Fifille : Pourquô, nous les jeunes, in dô s'cacher si in veut avôr un amoureux ! Patronne, j'va t'raconter ein séquo, mais te n'peux pô l' répéter à personne !
Y a deux mô, i pluvot averse, j'ai rencontré, à l'arrêt du bus, un gars qui dôt suremint êt' un footballeux d'Plostère. Qu'est-ce qui est bieau, c'garchon, avec un percing à s'n orell et un clou au-d'ssus de s'n oeul ! Et i paraît qui jue bin, ch'est ce que qui tout le monde y dit ! Et i fume pon ! J'voudro bin aller avec... mais li, i'sait pas que j'sus amoureux d'li ! Pourvu qu'i est déjà pas avec une aut' copine !

Patronne: T'as qu'à, ène fô, aller l'vir juer au stade Vanuxème, à Plostère ! Si qu'te veux te faire remartchi à ses yi, t'a qu'a t'habilli en nôr et oranche et dev'nir supporter du Plostère ! (qui regarde l'heure et s'aperçoit du retard pour l'heure de la réunion) Déjà c't heure là... In est là, ichi, qu'in babelle et qu'in babelle....L'heure elle tourne, tt'a-l'heure, i vont arriver et y aura rin d' prêt ! J'descinds à l'cave vir si j'ai assez d' bire, et ti, Fifille, t'as qu'à focque donner un coup d'balai et ranger les kayelles !

(Patronne sort et Fiston entre brusquement)

Fifille (avec la Patronne, elle prépare le local pour une réunion en rangeant les chaises) : Dis, Patronne, qu'est-ce qui va y avoir comme réunion, t't'à-l'heur. Min père, y dit que j'dô v'nir donner un coup de maonj, pour préparer la salle ! Parch ' qu'i a dit que l'réunion, elle pouvo pas trainer !

Patronne : Préparer l'salle ! Mais y a pas d'salle, ichi, m'fill' !
Y a que m'in café ! Et pourquô faire ein réunion ?
Quo qu'i a tout dit, tin père ?

Fifille : A mi, i m'a rin dit... mais j'l'ai intendu téléphoner à plein d'gins pour leu d'minder pour v'nir à c'te'réunion

Patronne : Mais quelle réunion ?

Fifille : J'sais pô, mi ! Ein' réunion des Anciens Combattants, de l'Ligue du Coin d'terre, des Rubani' ou des Bier-Buikske ! Mais si c'est tout des vi, ch'est pas la peine que j'reste, mi !

Patronne : J'va l'savôr tout d'sute ! (Elle va au téléphone)
Allo, Julot ? Ch'est mi, ichi ! Quo qu'ch'est que t'fille elle vint faire, ichi ! Elle dit qu'elle dô préparer ène réunion ! Ch'est quô, chette réunion ?...
Ah ouais ???....
Bin, t'aurô pu m'avertir !...
Ah ouais ??...
Bin, t'as qu'avô pas tant bôôr...
Ah ouais ??....
Ah bin, t'n'as qu'à l' savôr...
Ah ouais ??...
Bin alors, y aura beaucoup de monde ?....
Hein, tros chint (300) personnes ???
Bin, et d'où qu'in va les mettr' ???...
"In verra bin, in verra bin"... t'as vite dit, ti !
Bon, ch'est cha... in verra cha tt'al'heur !
Et les ceusses qui n'ont pas d'kayelle pour s'assir, i n'aquavette pas êtr' in r'tard ! (Elle racroche)
Ah bin, Julot, tin père, I n'in f'ra jomais ène belle : Vla qui va faire de l'politique, a c't heure !!!

Fifille : De politique ? Y est pas bin, li ! D'puis qu'y ga'ne pu avec ses coulons, i s'morfond et i sait pu quo faire d'ses dix dôgts. I va ouvrer, i rintr', i ming', et i raviss' l' télé. Et quand y a rin d'bieau à l'télé, i s'in va ! Prind' l'air ! qui dit toudi ! Et cha m'mère, elle le crô pô ! Et elle le supporte pô.

Patronne : Cha, j'pinse qu'in l'a déjà r'marqué !

Fifille : Si y est pas r'venu dans l' demi-heure, elle met sin minteau, et elle va cachi après. Et alors, y rintr'nt et y s'boud'nt ! T'as l'imache et y a pu d'son !

Patronne : Y a pu d' quô ???

Fifille : Bin, y rintr'nt et y s'boud'nt !

Patronne : Y s' boud'nt , Ch'est quô, cha ?

Fifille : Ils se boudent ! Ils se font la gueule, quoi ?

Patronne : Et cha dure longtimps ?

Fifille : Non, cha in peut pas dire ! Parche que mi j'vô bin qu'min père y incore amoureux de m'mère... Surtout quand qu'i arvint d'ichi !

Patronne : Elle a de l'chance, t' mère ! Elle a du goût, aussi, parche qu'un homme parell', mi j'n'in voudrô pon ! Tin père : "In vô bin quand y a bu, jamais quand y a sô !"

Fifille : Mais quand qu'ch'est comme cha, alors, i tir'nt ène tranche ! Et ène sacrée, sais-t ! Alors, , min père y va toudi lire sin journal quind ch'est comme cha, tout ravachi dins l'divan. Et y est toudi à moti plonj' . Et alors, i ravisse m'mère par dessus ses leunettes... avec des ïï d'amoureux en essayant de t'nir sin sérieux ! Elle va, elle vient, elle ronchonne tou seul... et min père, à la fin, y sait pas s'artenir de rire... Et elle non pu... Et l'scène de ménache, elle comminche toudis comme cha : quand li y a s'pronne, et elle y finit comme cha : quand i d'vint un ckaud laponj !

(Entrant par le fond de la salle, muni d'un porte-voix, il ameute la population, donc...le public)

Julot :
Avis à la population ! Ecoutez, Braves Gins du Vrai canton, avant qu'cha r'comminche !
A Bruqxelle, les gins du Gourvernemint, i z'ont décidé de r'grouper tous nos communes en un seul grand Comines ! Ch'est ène proposition que personne ichi y n'in veut ! Tous les Conseillers Communaux d'nos ville et villaches y sont là pour dire : les Ministr' y z'ont pas respecté notre avis ! Dans tous les communes du canton : à Houthem, à Plostère, à Warneton, à Bas-Warneton, et à Comines, in a tous donné s'n opinion sur cette saloperie d'fusion. Ch'étot pourtant pas difficile de suiv' chin qu'in d'mindô tertouss !
1° Les Plousterto avec les Warnetonno;
2° Les Mountches avec les Bas-Mountches;
3° Les Capello avec les Zhouthémo;
4° les ceusses du Mai-Cornet avec les Coméno !
Et l'affaire, elle étô faite ! Mais les Ministres, y z'ont pon voulu faire d'effort pour étudier nou proposition et faire des amind'mints ! Déjà qu'en 1963, i z'ont décidé nous balancer dans le Hainaut... sans penser à une route-express pour y arriver ! Sans train omnibus direct ! Après, ché ministres z'ont décidé qu'in d'vô tertouss devenir Wallons ! Mais, i n ' d'a pas un ichi qui l' comprind, l'Wallon ! Chti qui comprind l' Wallon, ichi, qu'i lève sin dô !...
Cha ch'étot ène décision des Flaminds qui voulot'nt pu d'nous-aut' en Flandre ! I z'arott'nt mi fait d'nous r'mett' avec la France... comme au temps d'Napoléon ! Alors, in se s'rô tous bin compris . Mais, cha n'aurô p'tête pas été mi non pu !

Y en a marre qu'on nous traite de Flamind quand in s'promène en Wallonie !
Y en a marre qu'on nous prend pour des Brusseleers quand on voyage en France !
Y en a marre qu'on nous traite de "Walekop" quand on voyage en Flandre !

Alors, braves gins du Vrai Canton, manifestons pour faire entendre chin qu'in veut ! Pour faire respecter l'démocratie, pour garder not' esprit d'clotchi, pour toudi avôr à mingi, et pour défend' not' chtimi !

Voici c' que vous proposse : In va s'réunir au Café du Mitan pour busîî et vôr chin qu'in peut faire pour nos infants ! Pache que sinon, ch'est eusse qui vont payer les pots cassés, si cha va comme ch'est parti ! Mesdames et Messieurs, je vous remer...

Simone (qui dépasse la tête entre les rideaux) : Julot...D'où qu' t' es ? !... Allez, Dépêche-te... Cha r'comminche !...

Julot : Ouais, cha va, j'arriv' !.... Avec elle, cha comminche toudi quand qu'mi j'ai fini ! (En apartée au public) J'y pinse, c'est fini, ché coliques ?....

Julot : Salut la compagnie !  Bin quô, t'es tout seu'...I sont tous partis ? (Il fait le geste de verser un verre)

Patronne : Bin, et ti, t'feimme, elle est pas v'nue avec !

Julot : Bin, non ! Elle est r'partie au docteur ! Elle a toudi du mô dans l'bas d'sin vint' ! Et chaque fô qu'elle s'énerv'... cha r'comminche !

Patronne : Te fais aussi tout c'que te peux pour l'endeuver !

Julot : Quo ? mi, l'amarjoli... Ah non, te peux po dire cha. Mi, j'sus plein d'attintions pour m' moti. Ch'est vrai que des fô, elle me scie les cottes.

Patronne : Ah ouais ? Elle aussi elle casse tes pi' ? Non.... !!

Julot : Te peux pas savôr c'qu'elle m'énerve, des fô ! Au boulot, ch'est min chef qui m'immerte en ravijant toudi cin que j'fais... et à m' maijon... ch'est m'feimm qui m'énerf qu'elle est toudis d'rire min tchu' Alors, tu vô là quelle vie que j' vis,... et... quind j'in peux pu... j'vins ichi. Heureusemint, ti, Patronne, t'es toudis là d'rrire tin comptôr pour écouter les gins, pour sourire gentimint, pour remonter le moral de gramin d'gins. Et pour mi, cha, ch'est brav' !...
J'diros même que... j't'aime bin. Pour mi, tes zy, ch'est comme une lueur de bonheur qui m'illumine !

Patronne : Cha va, Julot,Te n'as dit assez... Tin, à l' plache de m'faire des déclarations, moute me tin journal ! Pour vir quô qu'i a d' din aujourd'hu' !  (elle feuillette et tombe avec surprise sur un article )
Hein ??? T'as vu c'qui est écrit, Julot ?

Julot : Non, j'ai pô incor tout lu, ... J'vins d' l' accater !

Patronne : "Le projet de loi du Ministre Michel est déposé au Parlement pour le vote à propos des fusions de communes dont voici la nouvelle répartition qui entrera en vigueur à partir du 1^er janvier 1977... bla bla bla : Ah, voilà ... la nouvelle entité de Comines-Warneton : comprendra les anciennes communes de Bas-Warneton, Comines, Houthem, Ploegsteert et Warneton... "
Ah bin cha alors....

Julot : Ah bin merde alors ,... Ah, les Mountches, i se sont fait avôr, là... aussi grands qu'i sont leu Géants !...
Mais... cha va pas s'passer ainssin....Avec les gins du d'Geer, j'va déclarer la guerre...Faudra manifester !
Ene pétition !... non,mais attind ! 
En attindint...J'ai sô !... (Il fait le geste d'en reverser une et la boit)
Patronne...te m'en remets incor ène... et ène pour ti aussi!

Patronne : Dis, Julot... t'as pas peur que cha va r'comminchi ?

Julot : Non, non... pas cette fô-chi ! J'sus sûr !  Y avô du monde dans l'salle d'attente... et puis, avec chin que l'docteur y va li donner... j'pins' qu'elle va vite sortir d'sin cabinet pour courir à s'majon et s'assir sur l'min... dé cabinet !

FIN DU 1er ACTE

Fons : Verdoeme, qu'est-ce qu'il est pressé, une fois ?

Louis : Ch'est comme cha, ichi, cha rinte, cha sort ! Les gins, i venn'nt au cabaret, pas pach' qui z'ont sô, mais pour vir les copains, pour intind les nouvelles ! Et puis, s'fèimme, elle passe sin temps à buer les maillots ! Et sin garchon, y est pu bête que l' tram ! I dot l' su'vr' tout partout... pour li trouver ein fill' à marier... mais, j'pins' que ch'est l'père qui cache pour li !

Patronne : Là, Louis, te va un peu fort ! T'es là qu'te rigoles avec les copainj, que, quand qu'i sont à peine partis, qu' te casses du chuck su' leu' dos ! Ti, t'es célibataire... Avant d'parler des feimmes des z'aut'... trouve-z-en ène pour ti !

Fons : Après tout, verdoeme, qu'est-ce que je fais, ici ? Pourquoi j'ai venu ici dans ce café ?

Baptiste : T'es rintré ichi, nous in t'a pas mis déjhors. De fô que te pairô, ti aussi incore une tournée !

Louis : Non... Fons ! T'es ichi, pache t'es v'nu au théâtr' pour vôr ène belle piche in patô ! Mais, ichi, su' ces planckes, ch'est pas de l'comédie... Ch'est tout en vrai !  Hein ouais, patronne ?

Patronne : Absolumint... La preuve : ravisse, Fons... Te m'as même donné tin téléphone ultra moderne sans fil (elle le rend – et s'avance à l'avant scène) et tous ces gins-là, i z'ont fait comme ti, i sont v'nu au théat'... ! L'public... ch'est eusse, et ch'est l'public qui soutient l' théâtr' ! Mai'tnint, Monsieur Alphonse, si vous avez bien éteint votre GSM, vous pouvez retourner à votre place... Vous ne nous avez pas dérangés... la pièce, elle peut continuer là où nous avions été interrompus ! Voilà, au-revoir Alphonse et merci de votre visite !

Tous : Au revoir, Alphonse !

Baptiste : Final'mint, avec les Flaminds, in sait avôr des copains !

(Sur le comptoir, le téléphone sonne)

Patronne : Allo, ichi, l'Bistro du Mitan !.... Ch'est pour ti, Baptiste ! (qui vient à l'appareil)

Baptiste : Allo,... ouais...... ouais......OUAIS..... mais crie pas si fort..... j'arrive tout d'sute.... Ch'est cha... à t't a l'heure,... à moins l' quart !

Louis : Bon, patronne, Te veux bien mett' m'n tournée su' l'ardoisse ? J'vais rintrer tu duch'min à pid!

Baptiste : Attind, Louis... j'vin avec ti..... (Ils sont à la porte)
Euh....(en faisant le geste négatif de la tête) T'as pu sô....? Non,.... Te bô pu un verre ? non ?.....

Louis : Ah, Baptiste, quand qu'te l'deminde comme cha....(en faisant non de la tête)  Bin, non, j'ai pu sô et j'voudrô pô t'obligi à sortir tin port'-monnaie !

Baptiste : Bon, bin te l'auras bon ! Te me l' rappelle, hein ? Salut Patronne !

Patronne : Quel pochi, ch'ti là ! Li, pour li payer ène' pinte ! Ch'est comme si qu' t'li arrachrôt ses yy. I pinse qu'i va les prind' avec !

(Elle débarasse les tables – Soudain, la porte s'ouvre ! Julot, avec un journal)